Musa, Kiongozi Mcha Mungu

Ingawa ni bayana Henoko alikuwa na uongozi wa karibu na Mungu, tuna ufahamu zaidi juu ya uhusiano wa Musa na Mungu na tunaweza kusoma simulizi kadhaa juu ya mazungumzo kati ya Musa na Mungu. Kadiri tunavyosafiri na Musa kupitia katika milima na mabonde ya maisha ya kiongozi huyu mnyenyekevu, tunaona tena na tena sehemu moja muhimu kabisa ya maisha yake na siri ya mafanikio yake kama kiongozi mcha Mungu ilikuwa mawasiliano yake ya daima na uhusiano wake wa kudumu na Mungu.

Hebu fikiria jinsi ambavyo ingekuwa kuzungumza na Mungu na kuisikia sauti Yake kabisa. Ni ajabu kwamba Waisraeli hawakutafuta aina hii ya mazungumzo badala ya kumsihi Musa kuongea na Mungu kwa niaba yao (Kut. 20:18-21). Lakini, Mungu alikuwa amemwandaa Musa kwa ajili ya jambo hili, kuanzia katika mazungumzo yao katika kichaka kilichokuwa kikiwaka moto, katika mlima huu huu. Ingawa tunasoma juu ya maombi mengine binafsi ya Musa, tunaona kwamba ni kama wakati wote yupo mbele za Mungu, akiomba mwongozo na kufanya maombezi kwa ajili ya watu anaowaongoza.

`Katika matukio mawili, Musa anafanya maombezi kwa ajili ya watu wa familia yake. Maombezi yake yalizingirwa na hali gani, na ni kitu gani kingeweza kutokea ikiwa asingeingilia kuziba pengo hilo?

• Haruni: Kut. 32:1-14, 31-34; Kum. 9:20
• Miriamu: Hes. 12:13`

Kitu hasa kinachostaajabisha kuhusiana na mazungumzo na Miriamu ni kwamba

Musa ndiye alikuwa mwathirika wa vitendo vibaya na wivu wa Miriamu. Ingekuwa rahisi kwake kurudi nyumba na kumwacha Mungu atekeleze adhabu ambayo Haruni na Miriamu walistahili. Badala yake, alikuwa mwepesi kusamehe na kufanya maombezi kwa ajili ya uponyaji wa dada yake. Ni udhihirisho mkuu kiasi gani wa neema ya Mungu yenye kusamehe wenye dhambi tunayoiona hapa katika vitendo vya Musa.