Enoki Akafamba Akataura

Bhaibheri harina zvakawanda zvarinoutidza nezvevupenyu hwaEnoki, asi rinotizivisa kuti akafamba naMwari kwemakore 300 kusvika Mwari amutora kudenga. Kuperera nekuzvipa kunaMwari nguva dzose ndiko kunoratidza kunaka kwevupenyu hwemunhu!

Chinhu chimwechete chatinoziva nezvaEnoki chinogona kuva chekuti “haana kushanduka mutsika yake yekunamata” (VaRoma 12:12), kutsungirira nekukura pakuswedera kuna Mwari nekutenda zuva nezuva revupenyu hwake. Nyika yairamba ichinyanya kumuipira mumazuva ake, Enoki akaramba achishandira Mwari, zvekuti haana kukwanisa kuramba achizviita asingagari maari.

“Mukati memabasa avupenyu hwake, Enoki akaramba anevukama hwakanaka naMwari. Apo mabasa ake ainyanya kuwandisa, aiwedzeravo nguva dzake naMwari mumunamato. . . . Apedza nguva yakati kuti ari pakati pevanhu vake, achivabatsira nekuraira nekuratidza, aimbobva pavari, otsvaka nguva yake arioga yakanyarara, aine nzara nenyota yekuda kuziva zvitsvene izvo zvoga zvaipiwa Mwari. Mukuwadzana nekutaurirana naMwari, Enoki akawedzera kuratidza chimiro chitsvene chedenga. . . . Kunyange vakanga vasingadi Mwari vakashamiswa kuvona denga mumeso ake.”—Ellen G. White.

Mwari haatitarisiri kurarama tirikure nevanhu takazvivharira mumapako edu tiritoga, tisina zvatinobatsira nyika. SaEnoki, tinogona kushanda nekuziva zvinodiwa nevari pedyo nesu, asi izvi zvinoitika bedzi nekutaurirana nekufamba naMwari zvakanaka, achiratidza chimiro chake matiri.

Tinogona kunamata nguva dzose, kose kose. Hakuna nzvimbo iri panyika iyo Mwari asingagoni kutivona kana kutinzwa (Mapisarema 139:7–12); Anonzwa kuchema kwemwoyo nguva dzose, zvisinei kuti tiripi (Verenga Kuungudza 3:55–57). Asi panezvinofanira kutaurwa mukunamata mazwi achinzwikwa pane kunamatira mumwoyo. Tinogona kunamata takanyarara, tichigonazve kukanganiswa kana kusapedzisa pfungwa yedu kana mutsara, nekuramba takatarisa pachinhu ichocho. Asi kana tichinamata zvinonzwikwa, munguva muzeve-zeve kana mumatauriro edu emazuva ose, zvakakosha kuramba tichiziva kuti Mwari ariko, uye kuti akateerera, uye kuti tine zvatinoda kutotaura naye.